Осмогласная стихира Покрова «на целование»

(глас 1) Днесь возрадуемся еже на Небеси светлому ликованию, Божественных Апостол совокуплению и пророк согласию, таинство преславныя Богородицы, честнаго Ея Покрова. (глас 5) Днесь, возлюбленнии, желающе сие празднество торжествовати светло, моление в честном Ея храме, Юже виде блаженный Андрей на воздусе со Предтечею и Богословцем, со архангельским множеством, (глас 2) Небесному Царю приносяще молитвы за Царя и за верный народ, и за все православное христианство, (глас 6) глаголаше: Царю Небесный и всем Творче, приими моление Мое и помилуй вся верныя, благочестно с любовию прославляющая Тя, освяти сия и прослави по велицей Твоей милости. (глас 4) О како невидимо тленных сподобляя и осеняше Божественным Твоим омофором, имже покрый и осени вся сущая люди в честней Своей церкви. (глас 3) Како убо, Владычице, Твоего милостиваго и Божественнаго Покрова достойно воспоем светлое празднество? (глас 7) Радуйся, Покрове Дево Богородице, упование и прибежище и надежда спасения нашего, покрывающи нас от всех нападений сопротивных и защищающи ризою милости Твоея; (глас 8) на Тя бо уповающе вернии избавихомся от всякаго зла, Ты бо всех видимых и невидимых честнейши явися, но, Владычице Богородице, моли Сына Своего и Бога нашего мир и здравие и тверду державу подати Царю нашему, на поганыя победы (глас 1) и душам нашим велию милость.