barjaktarevic (barjaktarevic) wrote,
barjaktarevic
barjaktarevic

Category:

Акафист трием Оптинским братиям, на Пасху убиенным

Оригинал взят у ustavschik в Акафист трием Оптинским братиям, на Пасху убиенным
Выкладываю текст третьего акафиста в честь троих Оптинских новопреподобномучеников. Акафист воспроизводится по сетевой публикации, распространяемой в виде приложения для Android. Текст был извлечён из файла приложения и перекодирован; в процессе исправлены несколько опечаток. Текст собственно акафиста предваряется тропарём и кондаком преподобномученикам; иные тропари см. в этой записи «Уставных заметок».

Ака́фист трие́м О́птинским бра́тиям, на Па́сху убие́нным,
иеромона́ху Васи́лию, и́ноку Ферапо́нту, и́ноку Трофи́му
Тропа́рь, глас 3.
Подо́бен: Д
а веселя́тся небе́сная:
Да веселя́тся и́ноческая во́инства, / да ра́дуется ста́рцев О́птинских собра́ние, / я́ко на Па́сху добропобе́днии а́гнцы в О́птиной закла́шася, / и́же я́звами свои́ми уязви́ша де́монская во́инства, / и мучи́телево посрами́вше раче́ние, / мечено́сно в ра́йская се́ла всели́шася, / иде́же мо́лятся Христу́ Бо́гу // спасти́ся душа́м на́шим.
Конда́к, глас 8.
Подо́бен: А́
ще и во гроб снизше́л еси́:
А́ще и во гро́бы снизшли́ есте́ на Па́сху, / но не́бо ду́ши ва́ша прия́ло есть, / и воскресо́сте со Христо́м, я́ко Его́ ра́ди умертви́стеся, / и а́дову посрами́сте власть. / Те́мже на бра́ке А́гнчем лику́ете, / всера́достную воспева́юще песнь: / Христо́с воскре́се из ме́ртвых, // па́дшим подая́й воскресе́ние.
Конда́к 1
Избра́нным сыно́м ста́рцев О́птинских, Святы́я Тро́ицы тричи́сленным служи́телем, а́гнцем закла́нным на Па́сху Госпо́дню и дерзнове́ние добропобе́дное улучи́вшим, похва́льная принесе́м пе́ния; вы же воздви́гните нас от гробо́в нераде́ния, с любо́вию вам зову́щих: Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
И́кос 1
А́нгельскому житию́ подража́ти жела́юще, по́двигом му́ченическим в оби́тели О́птинстей просия́ли есте́, жизнь свою́ за Христа́ отда́вше, ны́не же в невече́рнем дни Ца́рствия Бо́жия с му́чениками ликовству́юще, услы́шите нас, по́мощи прося́щих и в моли́тве к вам вопию́щих:
Ра́дуйтеся, ра́дости Воскресе́ния провозве́стницы;
Ра́дуйтеся, О́птинских ста́рцев насле́дницы.
Ра́дуйтеся, благода́ти Бо́жия сосу́ди избра́ннии;
Ра́дуйтеся, златокова́ныя трубы́ Пасха́льныя.
Ра́дуйтеся, ра́нами свои́ми де́монов уязви́вшии;
Рáдуйтеся, трезвóном Пасхáльным диaвола оглуши́вшии.
Ра́дуйтеся, венцено́сцы Великопо́стническаго по́прища;
Ра́дуйтеся, знаменоно́сцы Пасха́льнаго А́гнца.
Ра́дуйтеся, мечено́сное небе́с прехожде́ние;
Ра́дуйтеся, Крестовоскре́сныя сла́вы явле́ние.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 2
Тро́ица Всеблага́я и Благопромысли́тельная от разли́чных конце́в земли́ ру́сския собра́ вас, отцы́ преподо́бнии, в оби́тель О́птинскую, е́же просла́вити вы в ли́це му́чеников тричи́сленных, на Па́сху убие́нных, да еди́неми усты́ пое́те песнь трегу́бо песносло́вимую: Аллилу́ия.
И́кос 2
Христа́ Воскре́сшаго сре́тити всем се́рдцем возжделе́вше, ина́го жития́, кроме́ и́ноческаго не пожела́ли есте́, пе́рвии насе́льницы возрожда́ющияся пу́стыни яви́стеся, труда́ми мно́гими себе́ смиря́юще и стра́сти умершвля́юще, по́двигом свои́м сте́ну неразори́мую оби́тели О́птинстей сози́ждили есте́, сего́ ра́ди благода́рственно воспева́ем вам си́це:
Ра́дуйтеся, на ни́ве Христо́ве порабо́тати прише́дшии;
Ра́дуйтеся, ра́лом страда́ния зе́млю се́рдца возде́лавшии.
Ра́дуйтеся, житие́м ста́рцев О́птинских себе́ назида́вшии;
Ра́дуйтеся, равноа́нгельную жизнь дости́гнути возжела́вшии.
Ра́дуйтеся, служб церко́вных рачи́тельнии моли́твеницы;
Ра́дуйтеся, трудолю́бия неле́ностнии подви́жницы.
Ра́дуйтеся, я́ко вертогра́д о́птинский украша́ете цвета́ми нетле́ния;
Ра́дуйтеся, я́ко гробни́цу ва́шу зи́ждете, я́ко Куву́клию Воскресе́ния.
Ра́дуйтеся, светоза́рнии лучи́ восходя́щия Па́схи;
Ра́дуйтеся, блаже́ннии прича́стницы Христо́вы Стра́сти.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 3
Во оби́тель дре́внюю прише́дше, у моги́л О́птинских ста́рцев моли́лися есте́, да укрепле́ни бу́дете у́зким путе́м ше́ствовати; просвеще́ни же бы́вше Ду́хом Святы́м, мир сей оста́вили есте́, и го́рняго Оте́чества дости́гнути жела́юще, воспе́ли благода́рственную песнь Бо́гу: Аллилу́ия.
И́кос 3
Име́юще в сердца́х свои́х благо́е жела́ние рабо́тати Го́сподеви, ре́вностно вооружи́стеся проти́ву ми́ра, диа́вола и страсте́й, по́двигом и́ноческим себе́ преда́сте, от си́лы возраста́юще в си́лу; сему́ ва́шему до́брому житию́ внима́юще, благода́рственно вам вопие́м:
Ра́дуйтеся, рачи́телие те́плаго покая́ния;
Ра́дуйтеся, искорени́телие хла́днаго отча́яния.
Ра́дуйтеся, мертволе́пное страсте́й умерщвле́ние;
Ра́дуйтеся, живоно́сное доброде́телей процвете́ние.
Ра́дуйтеся, на Па́сху Госпо́дню умре́ти жела́вшии;
Ра́дуйтеся, сме́ртию смерть во Христе́ попра́вшии.
Ра́дуйтеся, блаже́ннии уча́стницы пе́рваго Воскресе́ния;
Ра́дуйтеся, благоприча́стницы несконча́емаго весе́лия.
Ра́дуйтеся, я́ко тала́нты, от Бо́га вам да́нныя, в зе́млю не сокры́вшии;
Ра́дуйтеся, я́ко гро́бы ва́ша сокро́вищем нетле́ния обогати́вшии.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 4
Вся су́етная и ло́жная в ми́ре вре́меннем позна́сте, на ра́ло ру́ки ва́ша возложи́сте, я́ко и́стиннии возде́лователи ни́вы Христо́вы; трудо́м и́ноческим себе́ преда́ли есте́, моли́тву и по́двиги не я́ве, но та́йно творя́ще, не челове́ческия сла́вы взыску́юще, но сла́вы Бо́жия песнь хвале́бную пою́ще Бо́гу: Аллилу́ия.
И́кос 4
Житие́м стaрческим оби́тель святaя просла́вленная, безбoжники же разоре́нная, и`ноческим житие́м па́ки процвете́ и от разоре́ния и пе́пла воздви́жеся, венце́м же новому́ченическим ны́не венча́ется и красо́тами страстоте́рпческими украша́ется, сего́ ра́ди восхваля́ем вас си́це:
Ра́дуйтеся, обе́тов мона́шеских печа́ти златоза́рнии;
Ра́дуйтеся, ве́ры правосла́вныя адама́нти троегра́ннии.
Ра́дуйтеся, в неви́димей бра́ни и́ноцы непоколеби́мии;
Ра́дуйтеся, ору́жницы Христо́вы непреобори́мии.
Ра́дуйтеся, ду́ши ва́ша на вся́кую скорбь угото́вившии;
Ра́дуйтеся, телеса́ ва́ша в же́ртву живу́ю предста́вившии.
Ра́дуйтеся, преподобному́чеников о́птинских прее́мственная сла́во;
Ра́дуйтеся, новому́чеников ру́сских преди́вная добро́то.
Ра́дуйтеся, я́ко серпо́м страда́ния пожа́ти бы́сте в богоизбра́нныя кла́сы;
Ра́дуйтеся, я́ко угобзи́сте О́птинскую ни́ву новому́ченическою ле́тораслию.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 5
Житие́ свое́ по заве́ту ста́рцев О́птинских между́ стра́хом и наде́ждою проводи́вшии, о Ца́рствии Небе́снем и му́ках а́дских вы́ну помышля́вшии, непреле́стный путь и́ноческаго де́лания обрели́ есте́. Те́мже, я́ко сы́нове све́та, вопие́те Со́лнцу Пра́вды Христу́, разори́вшему грехо́вную тьму: Аллилу́ия.
И́кос 5
Блаже́нную жизнь избра́сте, преподо́бнии отцы́, е́же жи́ти бра́тии вку́пе в дому́ Бо́жием, в оби́тель О́птинскую всели́лися есте́, оба́че го́рних оби́телей дости́гнути жела́юще, по ле́ствице доброде́телей восхожде́ние в сердца́х свои́х положи́сте. Те́мже я́ко ева́нгельских блаже́нств дости́гших, ублажа́ем вас си́це:
Ра́дуйтеся, нищету́ духо́вную возлюби́вшии;
Ра́дуйтеся, слеза́ми оде́жду души́ убели́вшии.
Ра́дуйтеся, земли́ кро́тких насле́дницы;
Ра́дуйтеся, пра́вды Христо́вы споспе́шницы.
Ра́дуйтеся, поми́лование улучи́вшии ра́ди жи́зни же́ртвенныя;
Ра́дуйтеся, Богозри́тели ра́ди чистоты́ серде́чныя.
Ра́дуйтеся, я́ко брань страсте́й на́ших умиротворя́ете;
Ра́дуйтеся, я́ко ми́ром сим гони́мии, Не́бо населя́ете.
Ра́дуйтеся, стяжа́вшии Ца́рство Небе́сное;
Ра́дуйтеся, возше́дшии в Ра́дость Воскре́сшаго.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 6
Труда́ми мно́гими по́честей в ми́ре дости́гл еси́, о́тче Васи́лие, и тщету́ уразуме́в сла́вы челове́ческия, во́ли Бо́жия исполни́телем соде́лался еси́, и тала́нты тебе́ Бо́гом да́нныя преумно́жил еси́, про́поведию и духо́вными стиха́ми, я́коже ста́рец Варсоно́фий, к покая́нию наро́д ру́сский призыва́л еси́, науча́я воспева́ти Бо́гу: Аллилу́ия.
И́кос 6
Ве́дый, я́ко па́стырство есть сугу́бое со Христо́м сораспя́тие, взем крест после́довал еси́ Христу́, и мно́гим и́щущим утеше́ния па́стырем до́брым яви́лся еси́, врачу́я ду́ши благода́тию Бо́жией; мы же тебе́ и дво́ице и́ноков, я́ко а́гнцам твоего́ му́ченическаго ста́да, воспева́ем си́це:
Ра́дуйтеся, жезло́м креста́ диа́вола порази́вшии;
Ра́дуйтеся, свире́лию ва́ших моли́тв па́ству возвесели́вшии.
Ра́дуйтеся, свяще́нником похвало́ и и́ноком утвержде́ние;
Ра́дуйтеся, преподо́бных красото́ и му́чеников укрепле́ние.
Ра́дуйтеся, треплете́нная ве́рве нелицеме́рнаго братолю́бия;
Ра́дуйтеся, тристо́лпное основа́ние непреле́стнаго боголю́бия.
Ра́дуйтеся, я́ко у ва́ших гробо́в ду́ши на́ша оживля́ются;
Ра́дуйтеся, я́ко ва́шим предста́тельством стра́сти на́ша умерщвля́ются.
Ра́дуйтеся, дре́вних му́чеников подража́телие;
Ра́дуйтеся, новому́чеников равностоя́телие.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 7
Вся кра́сная ми́ра сего́ ни во что́ же вмени́в, кро́тостию и молчали́востию украси́лся еси́, о́тче Ферапо́нте, сего́ ра́ди в покая́ние, я́ко в ри́зу спасе́ния обле́клся и в О́птину пу́стынь к по́двигом духо́вным устреми́лся еси́, и от Го́спода вене́ц му́ченический прия́ти сподо́бился еси́, благода́рно поя́ Бо́гу: Аллилу́ия.
И́кос 7
Житию́ святы́х потща́лся еси́ подража́ти, о́тче Ферапо́нте, по́стничеством и бде́нием, я́ко щито́м, огради́лся еси́, моли́твою же Иису́совою, я́ко духо́вным мече́м, непреста́нно во уме́ враща́емым, главу́ зми́я сокруши́л еси́ и победоно́сным во́ином Христо́вым яви́лся еси́, сего́ ра́ди ско́рым помо́щником тебе́ в моли́тве призыва́ющим явля́ешися. Приими́ же с бра́тиями-му́чениками твои́ми благода́рственныя сия́ хвалы́:
Ра́дуйтеся, я́ко предобручи́стеся Христу́ и́ноческим житие́м;
Ра́дуйтеся, я́ко предочи́стилися есте́ моли́твою и посто́м.
Ра́дуйтеся, па́жить О́птинскую му́ченическою кро́вию удобри́вшии;
Ра́дуйтеся, ва́иями Пасха́льнаго ликова́ния сию́ украси́вшии.
Ра́дуйтеся, трие́ о́трасли лозы́ Христо́вы страда́ньми процве́тшии;
Ра́дуйтеся, от духо́внаго точи́ла вино́ умиле́ния изве́дшии.
Ра́дуйтеся, на све́щнице Боже́ственнем возже́ннии свети́льницы;
Ра́дуйтеся, на тве́рди Церко́вней трисия́нии му́ченицы.
Ра́дуйтеся, и́миже и́ночестии чи́ни утвержда́ются;
Ра́дуйтеся, и́миже ду́ши ве́рных укрепля́ются.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 8
Ко Творцу́ вся́ческих любо́вию воспламени́вся, во всех челове́цех, о́тче Трофи́ме, о́браз Бо́жий вы́ну зре́ти сподо́бился еси́, сего́ ра́ди в по́те лица́ твоего́ труди́лся еси́ на бла́го бли́жняго, милосе́рдием и сострада́нием виногра́дник се́рдца твоего́ украша́я и в ра́дости Го́сподеви взыва́я: Аллилу́ия.
И́кос 8
Ревну́я поревнова́л еси́, о́тче Трофи́ме, о е́же стяжа́ти се́рдце ми́лости испо́лненное, сего́ ра́ди не сту́ден, а горя́щ быв на дела́ Бо́жия и теплохла́дность душе́вную отри́нул еси́. За таково́е твое́ духо́вное раче́ние прославля́ем тя с спострада́вшими бра́тиями и благода́рственно воспева́ем вам си́це:
Ра́дуйтеся, я́ко церко́вную красоту́ созида́ете;
Ра́дуйтеся, я́ко мирску́ю суету́ упраздня́ете.
Ра́дуйтеся, О́птины пу́стыни живоже́ртвенное заколе́ние;
Ра́дуйтеся, Христу́ подража́тельное в ре́бра прободе́ние.
Ра́дуйтеся, лампа́ды неугаси́мыя бде́ний непреста́нных;
Ра́дуйтеся, кади́льницы благово́нныя молитвосло́вий сла́дких.
Ра́дуйтеся, по́стническаго по́прища кри́ни присноцвету́щии;
Ра́дуйтеся, Пасха́льныя ра́дости ре́ки приснотеку́щии.
Ра́дуйтеся, я́ко духо́вным весе́лием нас напая́ете;
Ра́дуйтеся, я́ко печа́ль мирску́ю изсуша́ете.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 9
Звонари́ иску́снии, Ферапо́нте и Трофи́ме, ра́дость Воскресе́ния Христо́ва ми́ру благовеству́юще, я́ко созре́вшии сно́пы пожа́ти бы́сте, и от трудо́в земны́х вку́пе с отце́м Васи́лием в жи́тницу Небе́сную угобзи́лися есте́, и я́ко сла́дкий хлеб Тро́ице Святе́й принесо́стеся, песнь воспева́юще: Аллилу́ия.
И́кос 9
Де́лом позна́сте, я́ко любы́ же́ртвенна есть, темже Христу́ сораспя́лися есте́, мече́м закала́емии, и кро́вию свое́ю не то́кмо ду́ши своя́ убели́ли, но и на́ша сердца́ окамене́нныя умягчи́ли есте́, сего́ ра́ди с любо́вию воспева́ем вам си́це:
Ра́дуйтеся, зво́нницы монасты́рския незри́мое украше́ние;
Ра́дуйтеся, мона́шескаго любому́дрия сладкагла́сное песнопе́ние.
Ра́дуйтеся, криле́ голуби́не псало́мски стяжа́вшии;
Ра́дуйтеся, на го́ры богове́дения те́ми возлете́вшии.
Ра́дуйтеся, о Страда́ниих Госпо́дних вы́ну помышля́вшии;
Ра́дуйтеся, за Тридне́вно Воскре́сшаго триеди́но уме́ршии.
Ра́дуйтеся, му́ченическою кро́вию свое́ю омы́вшиися;
Ра́дуйтеся, в виссо́н пра́ведности велеле́пно оде́вшиися.
Ра́дуйтеся, сме́рти да́вшии Пасха́льное целова́ние;
Ра́дуйтеся, доста́вившии врагу́ мно́жество рыда́ний.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 10
Посеще́ния преподо́бнаго Амвро́сия сподо́бивыйся, о́тче Васи́лие, да укрепле́н бу́деши пред искуше́нием вели́ким, вы́ю свою́ Го́сподеви преклони́л еси́, глаго́ля: — мне на Па́сху умре́ти вожделе́нно есть — и на закла́ние вку́пе с Ферапо́нтом и Трофи́мом после́довал еси́, воспева́я песнь Бо́гу: Аллилу́ия.
И́кос 10
Лоза́ И́стинная израсти́ вас, я́ко гро́здие сладча́йшии в вертогра́де О́птинстем, отцы́ всечестни́и Васи́лие, Ферапо́нте и Трофи́ме; Кро́вию Боже́ственною напое́ннии, в ре́бра богоненави́стно прободе́ннии, в страда́нии ва́шем изгнета́ете, я́ко от точи́ла, струи́ Боже́ственнаго ра́дования, утеша́юще всех вопию́щих к вам такова́я:
Ра́дуйтеся, О́птинскаго лу́га ра́йское прозябе́ние;
Ра́дуйтеся, арома́ти богоприя́тнии моли́твы и умиле́ния.
Ра́дуйтеся, со́ты храня́щии у́мную сла́дость;
Ра́дуйтеся, о́блацы крапя́щии неземну́ю ра́дость.
Ра́дуйтеся, ча́ши испо́лненныя и́ноческаго пла́ча;
Ра́дуйтеся, фиа́лы радостотво́рной по Бо́зе печа́ли.
Ра́дуйтеся, серде́чнаго вертогра́да цветни́к неувяда́емый;
Ра́дуйтеся, Иису́совы моли́твы исто́чник богозна́емый.
Ра́дуйтеся, и́миже сла́дость доброде́телей воспева́ется;
Ра́дуйтеся, и́миже го́речь скорбе́й истребля́ется.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 11
Дре́вний змий, не́навистию к ро́ду челове́ческому разжига́емый, потща́ся вас умертви́ти, благове́стников Воскресе́ния Христо́ва, отцы́ богоно́снии, а́ще и сосу́ды пло́ти ва́шея растерза́, оба́че жа́ло зло́бы своея́ то́кмо притупи́, душ же ва́ших не возмо́же улови́ти, песнь побе́дную Воскре́сшему Христу́ пою́щих: Аллилу́ия.
И́кос 11
Пу́стынь О́птинскую ны́не святоле́пно украша́ете, телесы́ же нетле́нными воскресе́ние ме́ртвых возвеща́ете, новому́ченицы О́птинстии Васи́лие, Ферапо́нте и Трофи́ме, главу́ зми́я, уязви́вшаго вас, весе́лыми нога́ми сотро́сте и в Го́рнее пра́здновати ве́чную Па́сху востекли́ есте; посети́те ны, гре́шныя, ва́шею моли́твою, и от зло́бы диа́вола изба́вите воспева́ющия вам сицева́я:
Ра́дуйтеся, Го́рняго Иерусали́ма насе́льницы;
Ра́дуйтеся, христокра́снии Пасха́льнии трисве́щницы.
Ра́дуйтеся, сы́нове О́птинских ста́рцев избра́нии;
Ра́дуйтеся, Це́ркве Христо́вы ча́да благонра́внии.
Ра́дуйтеся, трисве́тлая высото́ моли́твеннаго восхожде́ния;
Ра́дуйтеся, трилюбе́зная глубино́ и́ноческаго уедине́ния.
Ра́дуйтеся, кла́дези испо́лненнии духо́вными дарова́ниями;
Ра́дуйтеся, струи́ игра́ющия Пасха́льными ра́дованиями.
Ра́дуйтеся, я́ко чуде́с де́лателище часо́вня ва́ша яви́ся;
Ра́дуйтеся, я́ко в нетле́нную сла́дость гро́би ва́ша претвори́шася.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 12
Благода́ть Бо́жию оби́льно на вас излия́нную све́дуще, я́ко и по сме́рти не престае́те источа́ти чудеса́ от гробо́в ва́ших, те́мже мо́лим вас я́ко пропове́дников Воскресе́ния Христо́ва: оживи́те нас умершвле́нных душе́ю, да возста́вше от сна грехо́внаго в ра́дости духо́вней взыва́ем Христу́ Воскреси́телю ме́ртвых: Аллилу́ия.
И́кос 12
Пою́ще и сла́вяще ва́ше богоуго́дное житие́ и му́ченическую смерть Христа́ ра́ди, ве́даем, я́ко а́ще и мно́жество сложи́ли бы́хом песнопе́ний, не дово́льно бу́дет восхваля́ти вся сла́вная и вели́кая, я́же Госпо́дь в вас просла́вивыйся сотвори́, но я́ко благода́рная ча́да во умиле́нии серде́ц вопие́м к вам такова́я:
Ра́дуйтеся, я́ко Умертви́вшемуся за всех соумира́ете;
Ра́дуйтеся, я́ко со Воскре́сшим Христо́м совоскреса́ете.
Ра́дуйтеся, но́щи Пасха́льныя светоно́снии А́нгели;
Ра́дуйтеся, Великосуббо́тняго поко́я невозмути́мии стра́жи.
Ра́дуйтеся, я́ко стре́лы лука́ваго дале́че от нас отгоня́ете;
Ра́дуйтеся, я́ко копие́м ва́ших моли́тв бесо́в поража́ете.
Ра́дуйтеся, в со́нме му́ченичестем за нас предстоя́телие;
Ра́дуйтеся, в собо́ре О́птинских святы́х бли́жнии о нас хода́таи.
Ра́дуйтеся, и́миже от гробо́в нераде́ния возставля́емся;
Ра́дуйтеся, и́миже благода́тию воскресе́ния предозаря́емся.
Ра́дуйтеся, трие́ новому́ченицы О́птинстии, Христа́ Воскре́сшаго пропове́дницы.
Конда́к 13
О, треблаже́ннии новому́ченицы О́птинстии Васи́лие, Ферапо́нте и Трофи́ме, я́ко а́гнцы на Па́сху закла́ннии и в ра́дость ве́чную ко Христу́ вше́дшии, испроси́те нам у Го́спода страсте́й умершвле́ние и доброде́телей оживле́ние, Христо́ви сраспя́тися и с Ним совоскре́снути и сподо́битися вку́пе с ва́ми воспева́ти песнь Триеди́ному Бо́гу: Аллилу́ия.
Сей конда́к глаго́ли три́жды.
И па́ки чте́тся и́кос 1-й и конда́к 1-й
Моли́тва пе́рвая
О, пресла́внии новому́ченицы О́птинстии Васи́лие, Ферапо́нте и Трофи́ме, О́птины пу́стыни трисия́нное украше́ние! Вы от но́чи безве́рия во свет Христо́вы ве́ры при́звани бы́сте. В О́птину пу́стынь, я́ко к заре́ восходя́щей притекли́ есте́, и та́мо, я́ко еле́ни жа́ждущии, от изоби́льных исто́чников уче́ний ста́рческих напои́лися есте́, слеза́ми покая́ния зе́млю се́рдца омы́вше, подви́жническия плоды́ Пода́телю Воды́ Живы́я принесли́ есте́. Вы, я́ко рабо́тники единонадеся́таго часа́, в вертогра́д ста́рчества прише́дше, мир отве́ргли и страсте́й умерщвле́нием себе́ живопогребли́ есте́ и в кра́ткое вре́мя сла́дкий плод му́ченичества возде́лали.
Ны́не же во све́те Воскре́сшаго Христа́ лику́юще, испроси́те нам: се́рдца в ми́лости люботру́днаго, хране́ния ума́ в целому́дрии, в ве́ре утвержде́ния и духо́внаго раче́ния, да возста́вше от гробо́в нераде́ния, воспое́м и прослави́м с ва́ми тридне́вно возста́вшаго от гро́ба Христа́ Жизнода́вца ны́не и при́сно и во ве́ки веко́в. Ами́нь.
Моли́тва втора́я
О, тричи́сленнии преподобному́ченицы О́птинстии Васи́лие, Ферапо́нте и Трофи́ме, Христа́ Воскре́сшаго добропобе́днии побо́рницы! Вы, я́ко а́гнцы, закла́ни бы́сте в день Па́схи Госпо́дней и сами́х себе́ в же́ртву живу́ю Святе́й Тро́ице принесо́сте, в оби́тели О́птинстей у гробо́в ста́рческих упасо́стеся и уче́нием их, я́ко сла́дким бы́лием, вско́рмлени бы́сте. Услы́шите нас ны́не у ва́ших гробо́в предстоя́щих и ва́шим по́двигом озаря́емых. Испроси́те у Воскре́сшаго Христа́ страсте́й на́ших умерщвле́ние и ре́вности по Бо́зе оживле́ние.
Вы за му́ченический по́двиг свой нетле́нными венца́ми десни́цею Христо́вою венча́стеся, я́ко стра́сти Его́ соприча́стницы бы́сте, отону́дуже и ра́дости Воскресе́ния Его́ о́бщницы яви́стеся. Мы же в страсте́х безче́стия погребе́ннии и пу́тами многоразли́чных грехо́в связу́емии, вне Черто́га Бра́чнаго обрета́емся и ра́дости Ве́чери Пасха́льнаго А́гнца, увы́, лиша́емся. Но с те́плою моли́твою к вам обраща́емся я́ко ко ста́ршим бра́тиям и дерзнове́нным предста́телем на́шим. Умоли́те Христа́ Бо́га на́шего притупи́ти сме́рти жа́ло — грехо́вныя стра́сти на́ша и низпосла́ти в се́рдца на́ша, я́ко в Куву́клию, Огнь победоно́сныя ра́дости Воскресе́ния Христо́ва, да объя́тии пла́менем сим возмо́жем препобеди́ти грехо́вную тьму настоя́щаго ве́ка и светоно́сно испове́довати Христа́ Воскре́сшаго, всегда́, ны́не и при́сно и до сконча́ния ве́ка. Ами́нь.

Tags: Оптинские Новомученики
Subscribe

Comments for this post were disabled by the author